جو شخص یہ سمجھتا ہے کہ عمران خان بے خبر ہے اس سے بڑا بے خبر کوئی نہیں، شیخ رشید

لاہور : وفاقی وزیر ریلوے شیخ رشید نے کہا جو شخص یہ سمجھتا ہے عمران خان بے خبر ہے اس سے بڑا بے خبر کوئی نہیں، عمران خان کا پختہ عزم ہے نواز ، شہباز اور زرداری کو نہیں چھوڑنا، بلاول معصوم چیکو ہے، جسے زرداری اپنی سیاست کے لئے استعمال کر رہا ہے۔

تفصیلات کے مطابق وفاقی وزیر ریلوے شیخ رشید احمد نے ریلوے ہیڈ کوارٹر میں پریس کانفرنس کرتے ہوئے کہا عمران خان وزیر اعلیٰ عثمان بزدار کے پیچھے کھڑا ہے ،جو شخص یہ سمجھتا ہے کہ عمران خان بے خبر ہے اس سے بڑا بے خبر کوئی نہیں ۔

وزیر ریلوے کا کہنا تھا وزیر اعظم کے دورہ چین کے دوران ایم ایل ون کا معاملہ 12سے 14پہلے میرے دور میں ہوا اور اب اس کی ڈیزائننگ اور فزیبلٹی پر دستخط ہونے جارہے ہیں ، خزانے کے حالات اچھے نہیں ہیں اس لئے اسے تین فیزز میں مکمل کیا جائے گا ۔ جیسے ہی وزیر اعظم سے وقت ملے گا سر سید ایکسپریس کا راولپنڈی یا کراچی میں افتتاح کریں گے۔

انھوں نے کہا یہ راولپنڈی سے فیصل آباد براہ راست اور وہاں سے کراچی جائے گی ، اس حوالے سے گیارہ مئی کو اناﺅنس کر دیں گے ،اس میں کرائے کی تین کیٹگریز اکانومی سی اور اے سی سلیپرز ہوں گی اور اکانومی کلاس میں فوڈ بھی دیں گے ۔

عمران خان وزیر اعلیٰ عثمان بزدار کے پیچھے کھڑا ہے

شیخ رشید کا کہنا تھا موسم گرما کےلئے تیاری شروع کر دی ہے اور پاور وینز کو تیا رکر رہے ہیں، ریلو ے کے کال سنٹر اور کمال اینڈ کنٹرول سنٹر کو نجی شعبے کو دینے جارہے ہیں ، ٹریک مشینوں کی دیکھ بھال اور مینٹی ننس کا کام ریل کاپ کے سپرد کیا جارہا ہے ۔

وفاقی وزیر ریلوے نے کہا کہ سابقہ حکمرانوں نے صرف پروکیورمنٹ پر توجہ دی جبکہ ہم پرانی چیزوں کو ٹھیک کر کے ریلو ے کو چلا رہے ہیں، ہم نے 17لاکھ لیٹر تیل بچایا ہے ، مسافرٹرینوں نے 4ارب روپے کمائے ہیں ،فریٹ میں ہم کچھ پیچھے ہیں لیکن جون تک اس کا بھی ہدف حاصل کر لیں گے ۔

ان کا کہنا تھا میں نے کراچی میںاپنا دفتر بنا لیا ہے ، پی ایس او سے بات ہوئی ہے اگر فرنس آئل کی ترسیل کا معاہدہ ہوگیا تو فریٹ میں بھی منافع میں آ جائیں گے ۔

اسد عمر  قیمتی انسان ہے، خواہش ہے کہ وہ دوبارہ کابینہ کا حصہ بنیں

شیخ رشید نے کہا کہ ایم ایل ون منصوبے سے ڈیڑھ لاکھ لوگوں کوروزگار کے مواقع ملیں گے ، ریلوے میں دس ہزار بھرتیاں کرنی ہے لیکن انہیں شفاف رکھنا ضروری ہے ، نئی پرچیز اور ٹیکنیکل کمیٹی کا اعلان کریں گے ، میں نے سنگل ٹینڈرد کو مسترد کیا ہے اورواضح کہا ہے کہ کسی سطح پر سنگل ٹینڈر نہیں دوں گا۔

وزیر ریلوے کا ڈیزل کی قیمتوں میں اضافے کے حوالے سے کہنا تھا میں چاہتا ہوں کہ غریب آدمی کے روزے اور عید اچھی گزرے کرایوں کے حوالے سے عید کے بعد فیصلہ کریں گے ۔

انہوں نے چوہدی نثار کے حوالے سے کہا کہ چوہدری نثار حلف نہیں اٹھائے گا، عمران خان وزیر اعلیٰ عثمان بزدار کے پیچھے کھڑا ہے اورمیں آپ کو غلط خبر نہیں دوں گا، آج جو میری بات ہوئی ہے اس کے مطابق یہی ہے اگر پرسوں کچھ ہو جاتا ہے تو پھر میں کیا کہہ سکتا ہوں ۔

شیخ رشید کا کہنا تھا ٹیکنو کریٹ شیخ حفیظ ملک کا اثاثہ ہے اور اسد عمر بھی قیمتی انسان ہے ۔ میری کوشش ہے کہ چین روانگی سے قبل اسد عمر سے ملاقات ہو جائے اور خواہش ہے کہ وہ دوبارہ کابینہ کا حصہ بنیں ۔

انہوں نے کہا کہ میرا پی ٹی آئی کی لوکل سیاست سے کوئی تعلق نہیں ،میں صرف عمران خان کا ترجمان ہوں ،معیشت اور سیاست پر ان کے آٹھ ترجمان اور ہیں،میں عمران خان کا اتحادی ہوں اور سائے کی طرح ساتھ کھڑا ہوں ۔

عمران خان کا پختہ عزم ہے کہ نواز ، شہباز اور زرداری کو نہیں چھوڑے گا

وزیر ریلوے کا کہنا تھا عمران خان ملک کا وزیر اعظم ہے اور ہزاروں لوگ انہیں میسیجز کرتے ہیں ،میں نے انہیں کہا ہے کہ اتنا موبائل استعمال نہ کیا کریں ۔

شیخ رشید نے کہا کہ عمران خان بے خبر نہیں اور اگر کوئی یہ سمجھتا ہے کہ عمران خان بے خبر ہے تو اس سے بڑا بے خبر کوئی نہیں ۔ عمران خان پی ٹی آئی ، وزیر اعظم او سارے مسائل کے حل کا نام ہے اور اگر کسی کو کوئی غلط فہمی ہے تو اسے دور کر لینا چاہیے ۔

ان کا کہنا تھا نواز شریف اور شہباز شریف دو مختلف سیاسی بیانیوں کا نام ہے ۔ شہباز شریف نے گوٹی پھنسائی ہوئی ہے اور وکٹ کی دونوں طرف کھیل رہا ہے ،عمران خان کا پختہ عزم ہے کہ چوروں ، ڈاکوﺅں ، لٹیروں ، نواز ، شہباز اور زرداری کو نہیں چھوڑے گا،اگر لاہو ر ہائی کورٹ انہیں ضمانت دے دے تو عمران خان کیا کر سکتا ہے ۔

بلاول معصوم چیکو ہے جسے زرداری اپنی سیاست کے لئے استعمال کر رہا ہے

وزیر ریلوے نے کہا میں سپریم کورٹ کے چیف جسٹس سے اپیل کروں گاکہ جن پاپڑ، فالودے اور گنڈیری بیچنے والوں کے نام پر اکاﺅنٹس استعمال ہوئے ہیں وہ جیلوں میں بند ہیں لیکن اکاﺅنٹس کے جو اصل مالک ہیں وہ مزے سے پھر رہے ہیں اور انہیں کوئی پوچھنے والا نہیں ، ان بے گناہ لوگوں کو رہائی ملنی چاہیے ۔

انہوںنے کہا کہ بلاول بھٹو میں ملک کی خوشبو ہے ، بلاول معصوم چیکو ہے جسے زرداری اپنی سیاست کے لئے استعمال کر رہا ہے۔

The post جو شخص یہ سمجھتا ہے کہ عمران خان بے خبر ہے اس سے بڑا بے خبر کوئی نہیں، شیخ رشید appeared first on ARYNews.tv | Urdu - Har Lamha Bakhabar.

from ARYNews.tv | Urdu – Har Lamha Bakhabar http://bit.ly/2XG6nec
via IFTTT