پاکستان کو خطے کی ترقی کے لیے علاقائی تعاون کی طاقت پر یقین ہے: وزیر اعظم

اسلام آباد: وزیر اعظم عمران خان نے کہا ہے کہ پاکستان کو خطے کی ترقی کے لیے علاقائی تعاون کی طاقت پر یقین ہے۔

تفصیلات کے مطابق وزیر اعظم عمران خان نے 35 ویں سارک چارٹر ڈے پر پیغام جاری کرتے ہوئے کہا ہے کہ مجھے سارک ممبر ممالک کے عوام کو مبارک باد پیش کرتے ہوئے خوشی محسوس ہو رہی ہے، آج کے دن دور اندیش رہنماؤں نے سارک چارٹر کی بنیاد رکھی تھی۔

عمران خان نے کہا کہ 8 دسمبر اس دن کی نشان دہی کرتا ہے جب جنوبی ایشیا کی ترقی و خوش حالی کے لیے مل کر کام کرنے کا عہد کیا گیا، آج کا دن ہمارے کاندھوں پر رکھی بڑی ذمہ داری کی یاد دلاتا ہے، اس دن غربت، ناخواندگی، بیماریوں سے نمٹنے کے لیے حکمت عملی بنانے پر زور دیا گیا۔

وزیر اعظم نے کہا کہ پاکستان کو انفرادی، قومی اور خطے کی ترقی کے علاقائی تعاون کی طاقت پر یقین ہے، اس بات پر بھی یقین ہے کہ برابری اور باہمی عزت کے اصولوں پر علاقائی تعاون ممکن ہو سکتا ہے جیسا کہ سارک چارٹرڈ میں مذکور کیا گیا ہے۔

انھوں نے کہا کہ ہم سارک سے پاکستان کی وابستگی کے عزم کا اعادہ کرتے ہیں، امید ہے کہ مسلسل آگے بڑھنے کے عمل میں حائل رکاوٹ کو دور کیا جائے گا، اور یوں سارک اقوام کو ترقی کے لیے علاقائی تعاون کی راہ پر آگے بڑھتے رہنا ممکن ہو سکے گا۔

عمران خان نے کہا کہ میں جنوبی ایشیا کے لوگوں کے امن، ترقی اور خوش حالی کے لیے دعا گو ہوں۔

The post پاکستان کو خطے کی ترقی کے لیے علاقائی تعاون کی طاقت پر یقین ہے: وزیر اعظم appeared first on ARYNews.tv | Urdu - Har Lamha Bakhabar.

from ARYNews.tv | Urdu – Har Lamha Bakhabar https://ift.tt/38jvlGc
via IFTTT