نیلم جہلم پن بجلی گھرسے پیداوارایک ہزارمیگاواٹ سے تجاوزکرگئی

اسلام آباد:نیلم جہلم پن بجلی گھر نے ایک اور اہم سنگِ میل عبور کر لیا ،بجلی کی پیداوار ایک ہزار میگاواٹ سے تجاوز کر گئی ۔منگل کو ترجمان واپڈا کے مطابق نیلم جہلم سے ایک ہزار40میگاواٹ تک بجلی پیدا ہوئی ۔

ترجمان واپڈا نے بتایا کہ نیلم جہلم پراجیکٹ کی پیداواری استعداد 969 میگاواٹ ہے ۔ ان کا کہنا تھا کہ  استعداد سے زیادہ بجلی کی پیداوار پاور پلانٹ کے اعلیٰ معیار کی عکاس ہے ۔چیئرمین واپڈا نے اس اہم پیشہ ورانہ کامیابی پر نیلم جہلم پراجیکٹ انتظامیہ خصوصاً انجینئرز کو مبارکباد دی ۔

 ترجمان واپڈا نے کہاکہ توقع ہے پراجیکٹ رواں سال میں 4 ارب 60 کروڑ یونٹ سالانہ بجلی کی پیداوار کا ہدف حاصل کر لے گا ۔ یہ بات قابلِ ذکر ہے کہ رواں موسم میں نیلم جہلم پراجیکٹ نے اپنی پوری پیداواری استعداد 29مارچ کو حاصل کی تھی۔

 منصوبے کے چاروں پیداواری یونٹس چلانے کےلئے 280 مکعب میٹر فی سیکنڈ (کیومکس) پانی کا بہاؤدرکار ہوتا ہے ، جو دریائے نیلم میں ہائی فلو سیزن کی وجہ سے اِن دِنوں دستیاب ہے۔ دریائے نیلم میں ہائی فلو سیزن عام طور پر مارچ سے اگست تک جاری رہتا ہے۔

اپریل 2018 ءمیں پہلے یونٹ سے بجلی کی پیداوار کا آغاز ہونے سے اب تک نیلم جہلم ہائیڈرو پاور پراجیکٹ نیشنل گرڈ کو دو ارب 35 کروڑ یونٹ ماحول دوست پن بجلی فراہم کر چکا ہے.

آج کل منصوبہ روزانہ اوسطاً دوکروڑ یونٹ سے زائد بجلی مہیا کررہا ہے۔ توقع ہے کہ رواں سال یہ منصوبہ 4 ارب 60کروڑ یونٹ بجلی مہیا کرنے کا سالانہ ہدف حاصل کرلے گا۔

The post نیلم جہلم پن بجلی گھرسے  پیداوارایک ہزارمیگاواٹ سے تجاوزکرگئی  appeared first on ARYNews.tv | Urdu - Har Lamha Bakhabar.

from ARYNews.tv | Urdu – Har Lamha Bakhabar http://bit.ly/2IafX55
via IFTTT