سوشل میڈیا پر سابق وزیر خزانہ اسدعمر کیخلاف مہم

اسلام آباد : تحریک انصاف آفیشل سوشل میڈیا ٹیم نے سابق وزیر خزانہ اسد عمر کیخلاف شرمناک مہم کے مرکزی کردار فرحان ورک سے مکمل کاتعلقی کا اظہار کردیا، محمد کامران نے کہا فرحان ورک کاپی ٹی آئی آفیشل سوشل میڈیاٹیم سےتعلق نہیں، آفیشل سوشل میڈیا ٹیم کا کوئی بھی رکن کسی جعلی یا نفرت انگیز مہم میں ملوث پایا گیا تو سخت کارروائی کریں گے۔

تفصیلات کے مطابق سماجی میڈیا پر سابق وزیر خزانہ اسد عمر کیخلاف شرمناک مہم پر تحریک انصاف آفیشل سوشل میڈیا ٹیم نے مہم کے مرکزی کردار فرحان ورک سے مکمل کاتعلقی کا اظہار کردیا۔

تحریک انصاف سوشل میڈیا ٹیم کے سربراہ محمد کامران کا واضح بیان سامنے آگیا، جس میں انھوں نے کہا فرحان ورک نامی شخص کا تحریک انصاف کی آفیشل سوشل میڈیا ٹیم سے قطعاً کوئی تعلق نہیں، میڈیا غیر مجاز افراد کو تحریک انصاف سوشل میڈیا ٹیم کے طور پر پیش کرنے سے گریز کرے۔

محمد کامران کا کہنا تھا فرحان ورک نامی شخص سماجی میڈیا پر ان آفیشیل گروپ چلاتا ہے، تحریک انصاف آفیشل سوشل میڈیا ٹیم 2015 میں بھی فرحان ورک سے مکمل لاتعلقی کا اظہار کرچکی ہے، غیر مجاز شخص کو بطور تحریک انصاف کی سوشل میڈیا ٹیم کے نمائندے کے طور پر ٹی وی پر پیش کرنا افسوسناک ہے۔

سربراہ تحریک انصاف سوشل میڈیا نے کہا تحریک انصاف کی آفیشیل سوشل میڈیا ٹیم سینکڑوں رضاکاروں اور بے لوث کارکنوں پر مشتمل ہے، بے لوث کارکنان اور آفیشل سوشل میڈیا ٹیم تحریک انصاف کے بیانیے کی تشکیل و ترویج میں صحت مند کردار ادا کرتی ہے، محمد کامران

ان کا مزید کہنا تھا تحریک انصاف کی آفیشل سوشل میڈیا ٹیم کا ہر رکن نظم و ضبط کا پابند ہے، تحریک انصاف آفیشل سوشل میڈیا ٹیم اشتعال انگیزی یا کسی بھی نفرت انگیز مہم کا حصہ بننے کی بجائے صبر و ضبط کا مظاہرہ کرتی ہے۔

محمد کامران نے کہا غیر مجاز افراد کا ایک گروہ تحریک انصاف سے وابستگی کا تاثر دیکر سوشل میڈیا پر عدم برداشت کو فروغ دیتا ہے، سماجی میڈیا پر آفیشل سوشل میڈیا ٹیم ہی تحریک انصاف کے بارے میں مصدقہ اطلاعات کے فروغ کی مجاز اور ذمہ دار ہے۔

سربراہ کا کہنا تھا تحریک انصاف کے آفیشل اکاؤنٹس پر لگائے جانے والے مواد کی مکمل ذمہ داری قبول کرتے ہیں، آفیشل سوشل میڈیا ٹیم کا کوئی بھی رکن کسی جعلی یا نفرت انگیز مہم میں ملوث پایا گیا تو سخت کارروائی کریں گے، غیر مجاز افراد کی جانب سے سوشل میڈیا پر برپا کی جانے والی مہم سے مکمل لاتعلقی کا اظہار کرتے ہیں۔

The post سوشل میڈیا پر سابق وزیر خزانہ اسدعمر کیخلاف مہم appeared first on ARYNews.tv | Urdu - Har Lamha Bakhabar.

from ARYNews.tv | Urdu – Har Lamha Bakhabar http://bit.ly/2GF9AoN
via IFTTT