اسلام آباد میں‌ ڈینگی وائرس پھیلنے کا خدشہ، اسپتالوں‌ کو پیشگی اقدامات کرنے کی ہدایت

اسلام آباد: وزارتِ قومی صحت نے وفاق کے سرکاری اسپتالوں کو انسداد ڈینگی کے لیے پیشگی اقدامات کرنے کی ہدایت کرتے ہوئے مراسلہ جاری کردیا۔

وزارتِ صحت کی جانب سے جاری ہونے والے مراسلے میں ہدایت کی گئی ہے کہ روالپنڈی، اسلام آباد کے ریڈ زون میں ڈینگی وائرس کے شواہد موجود ہیں، متعلقہ ادارے تدارک کے لیے حکمتِ عملی مرتب کریں۔

مراسلے میں کہا گیا ہے کہ اسلام آباد میں ہر سال متعدد افراد ڈینگی مرض کا شکار ہوجاتے ہیں لہذا اسپتالوں میں بیڈز اور ادویات کی میں موجودگی کو ہر صورت یقینی بنایا جائے اور مرض کی تشخیص کے لیے بھی اقدامات کیے جائیں۔

وزارتِ صحت کے مراسلے میں کہا گیا ہے کہ ڈبلیو ایچ او کی ہدایت کی روشنی میں ڈینگی سے نمٹنے کے انتظامات کیے جائیں اور بالخصوص حساس علاقوں میں لاروا کے خاتمے کے لیے بھی اقدامات کیے جائیں۔

یاد رہے کہ قومی اسمبلی میں گزشتہ برس نومبر میں ایک رپورٹ پیش کی گئی تھی جس میں بتایا گیا تھا کہ چار سالوں کے دوران ملک بھر میں 51 ہزار سے زائد افراد ڈینگی جبکہ 6 سو سے زائد افراد کانگو بخار سے متاثر ہوئے۔

رپورٹ کے مطابق سال 2015 سے اب تک 51 ہزار 764 افراد ڈینگی سے متاثر ہوئے، سب سے زیادہ 28 ہزار 298 افراد صوبہ خیبر پختونخواہ میں متاثر ہوئے جبکہ اسی عرصے میں صوبہ سندھ میں 10 ہزار 447 اور صوبہ پنجاب میں 6 ہزار 58 افراد ڈینگی سے متاثر ہوئے۔

اسی طرح وفاقی دارالحکومت اسلام آباد میں 3 ہزار 930 افراد جبکہ بلوچستان میں 1965 افراد ڈینگی وائرس سے متاثر ہوئے۔ رپورٹ میں یہ بھی بتایا گیا تھا کہ چار سالوں کے دوران ملک بھر میں 107 افراد ڈینگی بخار سے ہلاک ہوئے۔

The post اسلام آباد میں‌ ڈینگی وائرس پھیلنے کا خدشہ، اسپتالوں‌ کو پیشگی اقدامات کرنے کی ہدایت appeared first on ARYNews.tv | Urdu - Har Lamha Bakhabar.

from ARYNews.tv | Urdu – Har Lamha Bakhabar http://bit.ly/2I98JOU
via IFTTT