ورلڈ کپ‘ پی سی بی نے کھلاڑیوں کی چیریٹی پروگرامزمیں شرکت پرپابندی لگادی

لندن: انگلینڈ کی سیریزاورورلڈ کپ کے دوران پاکستانی کھلاڑیوں کو بھاری معاوضہ وصول کرکے مختلف چیریٹی پروگرامز میں شرکت کی اجازت نہیں ہوگی۔

تفصیلات کے مطابق 2016 میں انگلینڈ کی ٹیسٹ سیریز، 2017 میں آئی سی سی چیمپئنز ٹرافی اور 2018 میں پھر ٹیسٹ سیریز کے دوران انگلینڈ میں بعض پروفیشنل آرگنائزرز نے ایسے چیریٹی پروگرام کرائے جس میں کئی بڑے کھلاڑی شریک ہوئے، موجودہ اورسابق کھلاڑیوں نے ان پروگراموں میں شرکت کےلئے منتظمین سے بھاری معاوضے لیے تھے۔

ذرائع کے مطابق یہ آرگنائزر دراصل چیریٹی کے نام پر پیسہ جمع کرتے ہوئے یہ دعویٰ کرتے تھے کہ ان پیسوں سے پاکستان میں مختلف فلاحی منصوبوں پر کام ہو گا لیکن ان منصوبوں کا پاکستان میں وجود ہی نہیں ہوتا تھا۔گزشتہ تین سال میں کئی کھلاڑیوں نے ان تقاریب میں شرکت کرکے خاصے پیسے کمائے۔

ان پروگراموں میں بعض کرکٹرز کے پاکستانی نژاد ایجنٹس بھی پیش پیش رہے جنہوں نے پیسوں کا لالچ دے کر کھلاڑیوں کو تقاریب میں مدعو کیا اور کھلاڑیوں کے پرستار نیلامی میں مختلف اشیاءخریدتے رہے اورڈنر کے مہنگے ٹکٹ فروخت کیے گئے۔

اس قسم کی صورتحال سے گریز کرنے کے لیے اس بار پاکستان کرکٹ بورڈ نے برٹش ایشین ٹرسٹ سے معاہدہ کیا ہے ،اس ٹرسٹ کے مرکزی حکام میں شہزادہ چارلس شامل ہیں۔اس سے قبل پی سی بی کا معاہدہ ایدھی ٹرسٹ کے ساتھ تھا۔

کراچی میں وسیم خان نے چیریٹی کے آفس کا دورہ کر کے ڈیل کو حتمی شکل دی اور پی سی بی نے اس بات کا اطمینان کر لیا کہ چیریٹی ٹرسٹ کا وجود موجود ہے اور اس سے حاصل ہونے والی آمدنی کسی اور مقصد کےلئے خرچ نہیں ہو گی۔

یہ بھی بتایا جارہا ہے کہ ورلڈ کپ کے بعد پاکستان کرکٹ بورڈ شاہد آفریدی فاؤنڈیشن سے نیا معاہدہ کر رہا ہے۔شاہد آفریدی اس ورلڈ کپ میں معاہدہ کرنا چاہتے تھے لیکن پی سی بی پہلے ہی ڈیل فائنل کر چکی تھی۔

پی سی بی ترجمان نے رابطہ کرنے پر تصدیق کی کہ پی سی بی نے انگلش سیزن کے لیے برٹش ایشین ٹرسٹ سے معاہدہ کیا ہے جب کہ شاہد آفریدی فاؤنڈیشن سے مستقبل کے لیے بات چیت چل رہی ہے۔

The post ورلڈ کپ‘ پی سی بی نے کھلاڑیوں کی چیریٹی پروگرامزمیں شرکت پرپابندی لگادی appeared first on ARYNews.tv | Urdu - Har Lamha Bakhabar.

from ARYNews.tv | Urdu – Har Lamha Bakhabar http://bit.ly/2GFLl9R
via IFTTT