تمام اسٹیک ہولڈرز میں جو تصادم پیدا ہوگیا ہے وہ کم ہونا چاہیئے: وزیر اعلیٰ سندھ

کراچی: وزیر اعلیٰ سندھ مراد علی شاہ کا کہنا ہے کہ آئین نے عوام کے ووٹ سے ملک کو مسائل سے نکالنے کا اختیار دیا، تمام اسٹیک ہولڈرز میں جو تصادم پیدا ہوگیا ہے وہ کم ہونا چاہیئے۔

تفصیلات کے مطابق وزیر اعلیٰ سندھ مراد علی شاہ نے نیشنل انسٹیٹیوٹ آف مینجمنٹ (این آئی ایم) میں سینئر مینجمنٹ کورس کے شرکا سے خطاب کیا۔ وزیر اعلیٰ نے ایس ایم سی کے شرکا کو مبارک باد دی۔

اپنے خطاب میں وزیر اعلیٰ کا کہنا تھا کہ تمام افسران کو عوامی مسائل حل کرنے میں کردار ادا کرنا ہے۔ ملک اس وقت مشکل حالات سے گزر رہا ہے۔ معاشی مسائل بڑھتے جا رہے ہیں۔ گورننس کے بہت مسائل ہیں۔

انہوں نے کہا کہ آئین نے عوام کے ووٹ سے ملک کو مسائل سے نکالنے کا اختیار دیا۔ تمام اسٹیک ہولڈرز میں جو تصادم پیدا ہو گیا ہے وہ کم ہونا چاہیئے۔

وزیر اعلیٰ کا کہنا تھا کہ سرکاری ملازمین طرز عمل والے قوانین ضرور پڑھیں۔ سرکاری ملازمین کے لیے بہترین قوانین موجود ہیں۔ قوانین کی روشنی میں سرکاری افسران کو کام کرنا ہے۔

انہوں نے کہا کہ بورڈ موجود ہے جو گریڈ بی ایس 19 سے 20 میں ترقی دیتا ہے۔ 23 تاریخ کو سی سی آئی میٹنگ میں مسائل سے آگاہ کروں گا۔ وزیر اعظم نے میٹنگ رکھی ہے، صوبوں کے مسائل پر بات ہوگی۔ آئل اینڈ گیس سے متعلق سندھ کے خدشات سامنے رکھوں گا۔

وزیر اعلیٰ کا کہنا تھا کہ وفاق نے 2016 میں سندھ کے 7 ارب کے قریب رقم کاٹی تھی، منصوبوں کے ساتھ فیڈریشن کے مسائل پر بھی آواز اٹھائیں گے۔

The post تمام اسٹیک ہولڈرز میں جو تصادم پیدا ہوگیا ہے وہ کم ہونا چاہیئے: وزیر اعلیٰ سندھ appeared first on ARYNews.tv | Urdu - Har Lamha Bakhabar.

from ARYNews.tv | Urdu – Har Lamha Bakhabar https://ift.tt/38YhZjd
via IFTTT